កំពត៖ រដ្ឋបាលក្រុងកំពតបានចេញសេចក្តីជូនដំណឹងដល់ម្ចាស់របង កញ្ចុះ និងសំណង់ផ្សេងៗ ដែលសង់រំលោភចំណីព្រែកកំពង់បាយត្រើយខាងលិច ត្រូវប្រញាប់រុះរើចេញជាបន្ទាន់ ដោយសាររដ្ឋបាលខេត្តត្រូវការកែលម្អច្រាំងព្រែកកំពង់បាយត្រើយខាងលិចចាប់ពីចំណុចស្ពានដែក ផ្លូវរថភ្លើង រហូតដល់គល់ស្ពានត្រើយកោះ សួនច្បារ ផ្លូវ ដើម្បីស្តារក្រុងឱ្យមានសោភ័ណភាពឡើងវិញ។

រដ្ឋបាលក្រុងកំពតទុករយៈពេល ១៥ថ្ងៃចាប់ពីថ្ងៃទី០១ ដល់ថ្ងៃទី១៥ ខែសីហា ឆ្នាំ២០២៣ ឱ្យម្ចាស់សំណង់ផ្សេងៗរុះរើចេញដោយខ្លួនឯង។ ចំពោះការរុះរើសំណង់គឺជាបន្ទុករបស់ម្ចាស់សំណង់។ ករណីម្ចាស់សំណង់ផ្សេងៗមិនអនុវត្តតាមសេចក្តីជូនដំណឹងនេះទេ រដ្ឋបាលក្រុងកំពតនឹងអនុវត្តតាមនីតិវិធីច្បាប់ និងរុះរើដោយមិនទទួលខុសត្រូវចំពោះការខូចខាតទ្រព្យសម្បត្តិឡើយ។

រដ្ឋបាលក្រុងកំពតបញ្ជាក់ឱ្យពលរដ្ឋដែលសង់សំណង់ផ្សេងៗចូលលើដីចំណីព្រែកកំពង់បាយត្រើយខាងលិច មានទីតាំងចាប់ពីចំណុច ខាងត្បូងស្ពានដែកផ្លូវរថ ភ្លើង រហូតមកដល់ចំណុចគល់ស្ពានត្រើយកោះ ស្ថិតនៅភូមិទ្វីខាងជើង និងទ្វីខាងត្បូង សង្កាត់អណ្តូងខ្មែរ ក្រុងកំពត ខេត្តកំពត អនុវត្តតាមការណែនាំខាងលើនេះ។

អភិបាលខេត្តកំពត លោក ម៉ៅ ធនិន នាព្រឹកថ្ងៃទី០២ ខែសីហានេះបានដឹកនាំកិច្ចពិភាក្សាអំពីគម្រោងស្ថាបនាផ្លូវមួយខ្សែចាប់ពីគល់ស្ពានរថភ្លើងដល់ស្ពានត្រើយកោះ និងត្រើយខាងលិចព្រែកកំពង់បាយ និងបង្កើតសួនច្បារត្រើយខាងលិច ដើម្បីជំរុញការទាក់ភ្ញៀវទេសចរឱ្យមកកម្សាន្តលេងនៅខេត្តកំពតកាន់តែច្រើនបន្ថែមទៀត៕